Raipuarte tana scheme thar hawn a ni

Nu nau chunga thihna a lo tlem zawk theihna atan leh hrisel taka nu in nau an neih theihna atana sorkar lapuiin ruahmanna a siam thar Prime Minister Safe Motherhood Scheme (PMSMA) chu Inrinni khan Aizawl Civil Hospital-a Gynae ODP-ah Health principal director Dr. K Ropari'n a hawng.

Dr. K Ropari chuan National Health Minission awm chhan chu mitinin hriselna
ṭha an neih theihna atan a ni tih sawiin, "Chumi zinga mi chu he scheme thar PMSMA hi a ni. He scheme hian nu nau chunga thihna awm thei pawh a veng dawn a ni. Scheme dang
ṭha tak tak Janani Suraksha Yogana(JSY) leh Janani Shishu Suraksha Karyakram(JSSK) te pawh hman mek a ni," a ti.

Scheme thar hi hlawhtling taka hman a nih theihna atan mipuite leh thawktute
ṭanrual a pawimawh tih sawiin Dr. K Ropari chuan, "He scheme hnuaia raipuar chuan a rai hun chhungin vawikhat tal doctor a rawn ngei tur a ni," a ti a, PMSMA hi Mizoram puma sorkar damdawi-in zawng zawngah leh sub-center-ahte kalpui tur a nih thu a sawi.

Dr. K Ropari tarlan danin, India ramah damdawi-ina nau nei 78.7% anih laiin Mizoramah chuan 89% a ni. Sub Center-a naupai in check up ṭhin India ramah 19.7% a ni a, Mizoramah chuan 71% a tling a ni.

RCH state programme officer Dr. Vanlalsawma tarlan danin, PMSMA hi nu in fit taka nau a neih theih nan a duan a niin, thla tin ni 9-naah doctor hmeichhe lam specialist emaw, MBBS emaw in nu naupai chu a en ṭhin ang. Ni 9 na hi holiday a nih chuan a tukah hman tho tur a ni.

He scheme hnuaiah hian heng test hrang hrang - BP test, weight, Hb%, urine ulbumin leh blood sugar, malaria, HIV, hepititis 'B' bakah damdawi - TT, iron folic acid, calcium, vitamin D, albendazole etc. hi a thlawn a nu naupai hnen ah pek leh tihsak tur a ni.

Lawngtlaiah pawh Inrinni khan CMO office-ah PMSMA hi DC Dr. A Muthamma-in a hawng. Dr A Muthamma chuan nu nau paite himna tur leh enkawlna tur scheme thar ṭha tak mai duan a ni chu lawmawm a tih sawiin, "Raipuar zawng zawng hi mi bik an ni a, enkawlna ṭha bik an phu vek. He scheme thar hian raipuarte tana nun nuam zawk a siam a, nausen pianghlim thihna leh nau chunga nu thihna te pawh a tihtlem theih ngei ka beisei," a ti.

Lawngtlai district-a PMSMA scheme bul ṭan nan hian July 8 leh 9 khan raipuar eng emaw zat chu a thlawnin en fiah an ni a a, an hriat tur pawimawh chi hrang hrang zirtir nghal an ni.

Inrinni vek khan Serchhipah pawh JN Hospital-ah PMSMA hi CDPO Vanlalhruaii'n a hawng. PMSMA hawnna hun hman anih rual hian inentirna tur clinic pawh hawn nghal a ni a, nu naupai mi 33 te hming ziah luh nghal niin, an inentir apianga an hman tur card pek chhuah nghal an ni.