LAD Minister-in VC tharte lawmpui

Village council enkawltu Local Admi­nistration department (LAD) minister K Lalrinliana chuan thuchah tichhuakin, Mizorama village council member atana thlan tharte lawmpuina a hlân.

LAD Minister chuan, Covid-19 léng kara VC inthlanna neih a ni chu lawmawm a tih thu sawiin, "Mipuite'n sor­kar ruahmanna zâwma kan aiawha khawtlang hruai hna chelh tur kan thlang thei hi ka lawm tak zet a ni. Inthlan theih lohna hmun ṭhenkhat la awmah pawh inthlanna theih thuai a nih ka beisei," a ti.

VC tharte a lawmpui thu sawiin K Lalrin­liana chuan, "Duhsakna sang ber ka hlan che u. Ram leh khawtlang rorelna hna kan thawhnaah theihtawp chhuah a, min thlangtu mipui leh Pathian ráwn chung zela khawtlang rorelna kalpui turin ka sâwm a che u," a ti a; candidate tling zo lote chu hnual mai lo a, khawtlang tana theihtawp chhuah zel turin a sáwm.

LAD Minister chuan, Mizoram sorkar­in khawtlang leh ramin hma a sawn zel theih nan VC-te a theih ang anga tihchakin, a dâwm kàn zel dawn thu sawiin, "Kan ramin hma a sawn zel theih nan thawhhona ṭha tak kan neih zel Pathian zarah ka beisei. Chumi tihlawhtling tur chuan VC atana thlan thar zawng zawngte ka sawm che u a ni," a ti.