Krismas hmaa hlawh pêk phût: Sports & Tourism-ah state matching share tur a awm reng - MPCC

Mizoram Pradesh Congress Committee (MPCC) Media department hotute chuan nimin khan Aizawl Press Club-ah thuthar thehdarhtute an kâwm a; sorkar hnathawk, rei tak hlawh pek tawh lohte chu Krismas hma ngeia pe turin sorkar an phût thu sawiin, "Sports leh Tourism atan sorkarin state matching share tur a nei reng tho," an ti.

MPCC Media chairman Dr Lallianchhunga chuan, MNF sorkarin December 2020 thlenga hlawh a pek theih loh sorkar hnathawk sang tél an awm nia sawiin, "Pension hlawh pawh an pe thei lo. Heng  zawng zawng hi Krismas hma ngeia pe turin Congress party chuan kan phût. Hlawh pek theih loh avangin Mizoram hmun hrang hrangah chhungkaw tam tak an buai phah a ni," a ti.

Dr Lallianchhunga chuan, Samagra Shiksha hnuaia thawk mi 4,000 chuangin August 2020 aṭangin hlawh an la thei tawh lo tih sawiin, "Heng zinga RMSA hnuaia thawk ṭhin high school-a thawkte'n Rs. 27,000 an hlawh tlangpui a, SSA hnuaia thawk ṭhin middle school leh primary school-a thawkte'n Rs. 25,000 vel an la thung," a ti a; an zinga tam zawk chu harsa taka khawsa an nih thu a sawi.

MPCC Media Chairman chuan, hlawh an lâk theih lohna a rei tawh avangin chhungkaw tam tak an tâlbuai tawh nia sawiin, "An zingah in sakna tur leh lirthei loan la tam tak an awm. Ni tin khawsak inrêlbàwlnaah sum tam tak an mamawh ve laiin, thla nga zet hlawh an lâk theih loh avangin an buai hle a ni," a ti.

RUSA hnuaia college hrang hranga assistant professor mi 69 pawhin May 2020 aṭangin hlawh an la thei tawh lo tih sawiin Lallianchhunga chuan, "Anni hian thla khatah Rs. 70,000 an hlawh. Hlawh an lak loh chungchangah sawifiahna Mizoram sorkarin a la nei lo," a ti a; RUSA hnuaia thawkte'n Chief Minister leh Higher Technical Education Minister hmuh tum mah se an hmuh theih loh thu a sawi.

Dr Lallianchhunga chuan, MNF kaihhruai Mizoram sorkarin state matching share a pek mumal loh avangin centrally sponsored scheme (CSS) hnuaia thawk, a bikin Health department leh Education department hnuaia thawk tam takin hlawh an la thei lo fo tih a sawi a, "Mizoram sorkarin sum a neih loh avangin matching share pekah harsatna a tâwk fo. Chutih laiin, Sports leh Tourism-ah chuan matching share pekah harsatna a awm ve lo," a ti.

MPCC Media department tarlan danin, Congress sorkar hun lai pawhin CSS hnuaia thawkte hlawh thla hnih/thum pek theih lohte pawh a awm ṭhin a; hunpui dáwnah erawh chuan sorkar laipui aṭanga sum hmuh a nih loh pawhin state sorkar sum pûka pek ṭhin a ni.