Dholchorra mipuiin ramri an hung An buai hma zawk ang - Phaisen YMA

Assam-a Mizoram dep khaw dang, Dholchorra khaw mipuite nimin khan Assam leh Mizoram inrìnaa Phaisen aṭanga kawngpui kal chu an state chinah an tichhia a, ramri-ah kawngpui an hung ping bawk. Phaisen Branch YMA hruaitute chuan, eng chen pawh hung se Mizoram lam chu a buai hmasa zawk an ni dawn lo a, Assam lam an buai hmasak zawk tur thu an sawi.

Phaisen aṭanga Vang­laini thu dawn danin, Dholchorra mite hian a tìrah chuan Mizoram ram chinah kawng hung an tum a; mahse, Village Task Force duty-te'n an phal loh avangin Assam ram chinah an hung a ni. Kawng an hung chhan an sawi lo a, mahse, ramri chungchanga Mizoram thil tih dan an duh loh thuin Dholchorra mipuite chu an au rual a ni.

Zawhna chhángin Phaisen Branch YMA hruaitute chuan, kawngpui chu an hung rei chuan Dholchorra mipuite chu a buai hmasak zawk tur an nih thu an sawi a, "JCB-te hmangin km. khat vel tal kawngpui chu lai chhe zawk turtein kan va hrilh a, an hung phui tâwk loh laite pawh kawhhmuhin, hung ṭha turtein kan hrilh a ni. An inhung rei poh leh anmahni an buai zawk ang," an ti.

Phaisen YMA hruai­tute chuan, Dholchorra mite chu buaina siam tum záwnga an chêt loh thu sawiin, "Dholchorra mai bakah, Assam hmun dang aṭangin hna thawkin mi eng emaw zat Phaisenah an awm a ni," an ti a; Mizoram chu an sum hmuhna ber pakhat a nih avangin Assam lam chu inhung reng harsa ti zawk an nih tur thu an sawi a ni.