VC uiretir tumah ZPM-in Dy. CM puh

ZPM chuan August 29, Inrinni khan thu­chhuah siamin, Tlangpui khuaa ZPM party aṭanga VC atana thlan tlinte chu deputy chief minister Tawnluia'n MNF-a inlet turin a thlêm niin an tarlang.

ZPM chuan, MNF senior vice president ni bawk Tawnluia'n a bial chhung, Tlangpui khuaa VC member thlan thar ZPM mite chu MNF-a inlet turin a thlêm tih sawiin, mipui thlan tlin hruaitute uire tuma bei loin, ram hmangaihna nen thawk se, thliar bik nei loin ram mipui tan rawngbawl se an duh thu an sawi.

MNF party hruaitute'n Hrianghmun khua Congress party aṭanga VC atana thlan tlin tharte pawh MNF-a inlet turin nasa takin an bei nia sawiin ZPM chuan, "Ram hlui zia pû a, ram hlui thawmhnaw inbela an che leh chiam mai hi pawi kan ti hle a ni," an ti. Ram hruaitu lu ber dawttuin mipui thlan khawtlang hruaitute uire tuma a thlêm chu mipui zahlohna leh thamlohna lian tak a ni tih sawiin, "Ram hruaitu ni tlak loah kan ngai a, a rang thei ang bera báng turin kan ngen a ni," an ti.

An party chu kum hnih a tling chauh tih sawiin ZPM chuan, "Chappui kâng ang maiin ṭhelh rual lohin a kâng chak hle. A kâng zau zel tur ṭhelh tuma beihna pawh a tâwk nasa a, amaherawhchu, Pathian leh mipuite zarah MLA thlan tlin pariat lai a nei thei ta hial a ni," an ti a; LC leh VC inthlan zawh tâk chu ZPM-in an hmachhawn vawi khatna a ni chunga khaw tam takah VC an nei chu lawmawm an tih thu an sawi. ZPM chuan, ram inrêlbàwl danah mipui lung a awi thei lo tih sawiin, "Ram siamṭhat hna thawk turin theih­tawp kan chhuah zel dawn a ni," an ti bawk.