Minister hoin Champhaiah ruihhlo hâl

Champhai District Drugs Disposal Committee buatsaihin, Champhai district police-te'n ruihhlo chi hrang hrang an mante leh district magistrate-in a man sava vehna atana hman airgun pathum chu nimin khan Champhai District Hospital incinerator-ah minister of state TJ Lalnuntluanga hoin hâl a ni.

TJ Lalnuntluanga chuan, ram dang leh hnam dangin ruihhlo hmangin Mizoram an rûn tih sawiin, chu chu tharum hmanga do lêt loin, hmangaihna thinlung nena do tlàn ṭha a tih thu a sawi a, "Hemi tur hian kan thinlungah ram leh hnam hmangaihna dik tak tuh thar leh a ṭul. Ruihhlo ngaite enkawlna hmunte hi  thiamthil zirna leh nun kaihruai thei zawnga buatsaih a ṭul," a ti.

Chhungkuaa buaina thlentu, khawtlang leh rama innghirnghona leh rálṭitna thlentu ruihhlo do kawngah theihtawp chhuah a ni chu lawmawm a tih thu sawiin Minister chuan, "Mahni ṭánghma hâi hauh lo leh hrehawm pawisa loa beitute an fakawm. Ruihhlo beih lêtnaah theihtawp chhuah ka tum a ni," a ti a; mahni phâk tâwk ṭheuha pên chhuak turin mipui a sáwm.

Champhai DC Maria CT Zuali pawhin thu sawiin, ṭhalai tam tak suattu ruihhlo man a nih theihna tura theihtawp chhuah ṭhintu police leh YMA-te fakawm a tih thu a sawi a, thâ thlah loa ṭang mar zel turin a fuih.

Champhai SP Rex Zarzoliana Vanchhawng chuan, ruihhlo do beihpui thlakna, Anti Drug Drive pualin ruihhlo hâl a nih thu a sawi a, "Hei hian ruihhlo do kawngah mipuite zirtirna zau zawk a pe thei dawn a, ruihhlo donaa lungrual taka hmalaknain mipuiah leh a la ti ve loteah zirtirna ṭha tak a pe dawn a ni," a ti. 

Nimina ruihhlo hâlte chu thubuai kal lai mek heroin gram 877 (Rs. 17,52,000 man) leh methamphetamine gram 960 (Rs. 4,50,000 man) te, District Court-in tihral a phal tawh heroin gram 3155.3 leh ganja kg 72.6 te a ni a, a vaia a hlut zawng chu Rs. 1,70,72,300 a ni. Drugs & Cosmetics Act hnuaia man khuh damdawi Kof-T búr 83 leh Koff-Rum bûr 17 hâl a ni bawk.