Ruihhlo do beihpui thlakna hawng

Social Welfare department (SWD) minister Dr K Beichhua chuan nimin khan Secretariat conference hall-ah ruihhlo dona beihpui thlakna - Nasha Mukt Bharat Campaign (Drugs Free India Campaign) chu a hawng a; ruihhlo dona atana social media campaign a hawng bawk.

Ruihhlo bâwiha táng mekte chhan­chhuak tur leh a la ti lote'n an tih ve lohna turin sorkar, kohhran, tlawmngai pawl, chhungkua leh mi tinte'n mawh an phurh thu Dr K Beichhua chuan a sawi.

Ministry of Social Justice & Empower­ment-in zirchianna a neih hnuah India rama ruihhlo hluarna district 272 thlan chhuah a ni a; district 272 zingah Mizorama district pathum - Aizawl, Kolasib leh Champhai an tel.

Nasha Mukt Bharat Campaign nimina hawn hi Aizawl district chhung bika hmalakna tur a ni a; India ram pum huapin August 15, 2020 khan hawn a lo ni tawh a, March 31, 2021 thleng kalpui a ni ang.

Campaign programme hnuaiah hian district tinah peer voluteer 50 zel thlan tur niin, damdawi/ruihhlo hmansual leh a kaihhnawih chungchang zirtirna kalpui a ni ang. Volunteer-te chuan a ṭul angin counselling an pe ang a, peer volunteer club-te dinin, ruihhlo laka ṭhalaite an fihlim theih nan ṭan an la dawn a ni.