Sports minister-in East Lungdar, Sailulak leh Leng khuate a tlawh

Sports & Youth Ser­vices minister Robert Romawia Royte chuan nimin khan East Lungdar, Sailulâk leh Léng khuate a tlawh a, East Lungdarah football leh boxing academy din a nih tur thu a sawi.

East Lungdara amah lo hmuaktute hmaah thu sawiin Robert Romawia chuan, "Covid-19 vanga harsatna khirh tak karah pawh chief minister Pu Zoramthanga tumruhna leh nacháng hriatna avangin hmasawnna hnathawh a kal reng a ni," a ti a; hripui a reh hunah phei chuan chak leh zualin hmasawnna hnathawh kalpui a nih tur thu a sawi.

Sports Minister chuan, Hrangturzo bialtu MLA Lalchamliana kaihhruaina leh East Lungdar VC rawt angin E Lungdarah computer zirna, football academy leh boxing academy sorkarin a din tur thu a puang a, "Covid-19 avanga khapna hlih a nih veleh hmalak nghal a ni ang," a ti.