Dy.CM hlui enkawl dept thubuaiah Lokayukta-in TO-ah sawifiahna a dil
Mizoram Lokayukta chuan deputy chief minister hlui Tawnluia enkawl department-a sum hman dik loh a awm nia complaint a dawn chungchangah Aizawl South Treasury Officer (TO) hnenah sawifiahna a dil.
Mizoram Pradesh Youth Congress Committee (MPYCC) chuan July 10, 2023 khan Lokayukta-ah complaint an thehlut a; chutih laia Assembly speaker Lalrinliana Sailo-in USA-a a zinnaah Deputy Chief Minister enkawl department hnuaiah cheng nuai 100 chuang hnathawh awm loa ziah ral a nih thu a sawi chungchang chhui turin an ngen.
Lokayukta chuan ngenna a dawn chu zir chiangin, chhui chian tlakah a ngai a, preliminary enquiry tih turin thutlukna a siam. July 18, 2023 khan preliminary enquiry ti turin Anti Corruption Bureau (ACB) a hriattir a, ACB chuan August 1, 2023 khan FIR an ziak lut. ACB-in preliminary enquiry an ti a, hun eng emaw chen an chhui hnuah October 13, 2023 khan Lokayukta-ah report an thehlut a ni.
Lokayukta chuan ACB report chu a zir chian hnuah duhkhawp loh an nei a, information leh evidence an duhte chu November 28, 2023 khan ACB an dil leh a ni. ACB chuan Lokayukta-in information leh evidence an dil belhte chu January 18, 2024 khan Lokayukta-ah an thawn leh tawh bawk.
ACB-in an thehluh nawn leh pawh chu Lokayukta chuan a la duhkhawp lo a, January 30, 2024 khan information dang ACB-ah an dil leh a, ACB pawhin May 5, 2024 khan an chháng leh a ni.
ACB-in an chhan lehnate an zir chian hnuah Lokayukta chuan July 2024 tàwp lam khan Aizawl South Treasury Officer hnenah sawifiahna an dil. Aizawl South Treasury aṭanga sawifiahna an dawn hunah thubuai kalpui zel dan turah Lokayukta chuan thutlukna a siam ang.