Chhiatna thlengte a theih ang anga buaipui zel kan tum - DMR Minister

Disaster Management & Reha-bilitation (DMR) minister K Sapdanga chuan, chhiatna thlengte a theih ang anga buaipui zel an tum thu a sawi.

Aizawl North-III bialtu MLA K Sapdanga, DMR minister hian nimin khan a bial chhung Zarkawta lung rem chimna hmun leh Electric Venga leiminna hmun a tlawh a; khawtlang hruaitute'n lo dawngsawngin, chhiatna thlenga hmalak dan tur an sawiho a ni.

DMR Minister chuan, May 2024 tawp lamah Mizoramin Cyclone Remal a tawrh thu sawiin, "Aizawl leh Mizoram hmun hrang hrangah chhiatna namênlo kan tuar a, mahni bial bik pawh duh anga ngaihven hman loin kan awm hial a ni. Bial mipui beisei ang leh keimah ngei pawhin ka duh angin mahni bial ngaihsak bik hleithei loin ka awm a, a hrehawm hle," a ti.

Chhiatna thlengte a theih ang angin buaipui zel an tum tih sawiin K Sapdanga chuan, "Sum indaih lohna nasa tak karah pawh a theih ang anga hma la turin kan inbuatsaih zel," a ti a, a tih theih tawkah sorkar chu tlanchhiat a tum loh thu a sawi.