Mizoramin National Games 2032 thlen a duh thu NITI Aayog-ah thlen

Minister of state Lalnghinglova Hmar chuan nimin khan Delhi-a NITI Aayog hmunpuiah NITI Aayog hotute a kâwm a; Mizoramin National Games 2032 thlen a duh thu a thlen.

Lalnghinglova Hmar hian a enkawl department zinga pahnih - Sports & Youth Services leh Labour, Employment, Skill Development and Entrepreneurship (LESDE) kaihhnawih thil pawi­mawhte NITI Aayog hotute hnenah a thlen a ni.

Lalnghinglova Hmar hian NITI Aayog member Dr VK Paul kâwmin, Mizorama skill training centre din chungchang leh Olympics 2036-ah Mizo infiammi a tam thei ang ber an tel theihna tura hmalak dan tur a sawipui a; Mizoramin National Games 2032 thlen a duh tih a hrilh. Infiamna chu intihhlimna mai ni lo, taksa leh rilru hriselna atana pawimawh tak leh khawvel hmuha India pho lang theitu a nih thu a sawi bawk.

LESDE Minister chuan, Mizoramah thiamthil zirna, skill training centre lian a awm loh avangin Mizo ṭhalaite’n harsatna an tawh ṭhin thu sawiin, sorkar laipui hnuaia skill development project-ah Mizoram nena inmil leh Mizo ṭhalaite thiam zawng job role siam a pawimawh thu a sawi. Mizoram ṭhalaite’n kut themthiamnaah theihna sang tak an nei a, an theihnate pho chhuak a, eizawnna’n an hman theih nan NITI Aayog nen thawh dun a duh thu Dr VK Paul a hrilh.

Dr VK Paul chuan, Minister thu thlente chu a ngaih pawimawh thu a sawi a; chiang zawka rawtna (proposal) ziaka thehlut tura chahin, Mizoram sorkar leh NITI Aayog-te’n presentation siamin September 2024 chawhma lamah meeting neih leh ni se, an ti.

Minister-in a sàwm angin October 2024 chhung ngeiin Mizorama zin a tum thu VK Paul chuan a sawi bawk.

Lalnghinglova Hmar hian NITI Aayog-a adviser for northeast Yugal Joshi pawh a kâwm a; Olympic 2036 inbuatsaihna pakhatah public private partnership (PPP) mode-in sport discipline hrang hrangah coaching kalpui tum a nih thu leh, Mizorama khua zawng zawng telh tum a nih thu a sawi a ni.