Ramri hrúla kawng chhia siam phût

Tlabung Sub-Division huam chhunga ramri hrûla awm khaw pasariha tlawmngai pawl hruaitute chuan ngenna inṭâwm ziaka siamin, an khaw pawhtu kawngpui siamṭha thuai turin ABCI Infrastructure Pvt.Ltd. an phût tih an tarlang.

Kawngpui siamṭha tura ngenna leh phûtna lehkhaah hian khaw pasarih - Bulongsury, Tippereghat-I, Tippere­ghat-II, Tippereghat-III, Larei Veng, Old Khojoy­sury leh New Khojoy­sury-a Young Chakma Association (YCA) president ṭheuhte'n hming an ziak a ni.

Khaw pasariha YCA-te tarlan danin, Indo-Bangla border kawng chu kum 2016-17 khan Central PWD-in an thawm ṭha a, mahse, kawng chu ABCI Infrastructure company-in lung phurhna atana an hman lirthei lianin an zawh nasat avangin a chhiat hma phah a ni.

YCA-te chuan, an khaw kawng chhia avangin mipuiin harsatna an tâwk nasa tih an tarlang a; kawng chu November 15, 2020 ral hmaa thawm ṭhat hna thawk zo ngei turin ABCI Infrastructure hotute an phût tih an tarlang bawk.