Eye Donation Fortnight hman a ni; Mit pe turin mi 8,982 inziak lut tawh

National Programme for Blindness & Visual Impairment chuan nimin khan Health department pisaah a thlawna mit pek leh mit pek chungchang inzirtirna ni, Eye Donation Fortnight vawi 39-na an hmang a, Health department-a thawkte tan a thlawna mit entirna an buatsaih. Thih hnua mit pe turin mi 8,982 an inziak lut tawh tih tarlan a ni.

Eye Donation Fortnight hmanna inkhawm hi National Health Mission (NHM) mission director Dr Eric Zomawia'n a kaihruai a, Health Services director Dr Lalremmawii khuallian a ni. Khuallian chuan, mamawhtute hnena mit pek hlutna uar zawka mipui zirtirna a ṭul thu sawiin, ṭan la zual zel turin thawktute a chah.

Civil Hospital, Aizawla eye donation counsellor Mimi Zodinthari'n Civil Hospital Aizawl Eye Bank dinhmun a tarlan danin, Civil Hospital Eye Bank chu July 12, 2008-ah Eye Bank Association of India-ah ziah luh niin, July 31, 2008-ah hawn a ni.

July 2008 aṭanga August 27, 2024 thlengin Eye Bank-ah mit pe turin mi 8,982 an inziak lut tawh a; A tak taka mit pe tawh chu mi 568 an ni a; mit lâk tawh zawng zawng chu 1,130 a ni (mi pakhatah mit pahnih lak theih a ni). Mit thlak duhin mitdel 362 an inziak lut tawh a; corneal transplant hmasa ber chu CHA Eye Department leh Sri Sankaradeva Nethralaya, Guwahati ṭangkawpin September 25, 2009 khan an ti a, corneal transplant tih tawh zat chu 502 a ni.

NPBVI state programme officer Dr Lalnuntluangi Khiangte tarlan danin, India ramah mitdel mi nuai 10 vel an awm a, mit khing del mi nuai 68 an awm a; mit darthlalang (cornea) ṭhat loh vanga mitdel an ni tlangpui. Mitdelte'n mitvár an neih leh theihna turin mi dangin mit an pek a ngai a, mitdel zat leh mit pe tura intiam tawh zat a la inthlau hle niin a sawi.

Eye Donation Fortnight chhung hian radio leh TV-ahte mit pek (eye donation) chungchang inzirtirna hun hman tum a ni a; nimina a hawnnaa free clinic-ah hian Health depatment-a thawk mi 100-te mit enfiah a ni.