Health department-in kumin 2024-ah rúl chuk report 198 an dawng tawh

Health & Family Welfare department chuan thuchhuah siamin, tunlai hian Mizoramah rûl chuk vanga harsatna tâwk an tam thu leh kumin 2024-ah rûl chuk report 198 an dawn tawh thu an tarlang. Mizorama primary health center (PHC) leh sorkar damdawi-in hrang hrangah anti-snake venom dah a nih thu an tarlang bawk.

HFW department tarlan danin, Integrated Health Infor-mation Platform (IHIP) report ang chuan, kumin January 1 aṭanga August 28 thleng khan Mizoramah rûl chuk report 198 dawn a ni tawh a; chu'ng zinga 142 chu enkawl ngai leh damdawi-in panpui an ni a, damdawi-in panpui zinga mi 135 (95%) chu sorkar damdawi-ina enkawl an ni.

Rûlin a chukte'n enkawlna ṭha zawk an dawn theih nan kum 2021-22 aṭangin Mizorama district hospital tinah antisnake venom dah ṭan a nih thu tarlangin HFW department chuan, "Kum 2022-23 aṭang khan primary health center leh a chung lam sorkar damdawi-inahte dah a ni," an ti.

Health department chuan, kum 2023-24 aṭangin Mizoramah National Programme for Prevention and Control of Snakebite Envenoming (NPSE) programme kalpui ṭan a nih thu leh kawng hrang hrangin hmalak mek a nih thu an tarlang bawk.