National Sports Day hman a ni

Nimin khan National Sports Day a ni a, Mizoram hmun hrang hrangah hman niin, thupui chu 'Sports for the promotion of peaceful and inclusive societies' tih a ni.

National Sports Day hi Aizawlah chuan Sports Authority of India (SAI) Centre, Mission Vengthlangah hman a ni a, Sports & Youth Services secretary Lalramsanga Sailo khuallian a ni. Khuallian chuan, infiamna chu mihringte indaidanna ṭhiattu, remna leh inpumkhatna atan hmanrua pawimawh a nih thu sawiin, "Hriselna leh infiamna hi thil kal kawp tlat a ni a, mimal invawn nan, ruihhlo do nan leh rilru lam harsatnate hneh nana ṭangkai a ni," a ti a; Vision Olympic 2036 kalpui mekah infiammite leh infiamna lama inhmangte ṭang rual turin a sáwm.

Inkhawm hi SYS joint director C Lalremsanga'n a kaihruai a; taksa a hrisel zawk nan ni tin darkar chanve tal taksa sawizawi ṭhin tura intiamna thu sawi rual a ni. Mini marathon leh Mizo infiamna (indigenous game)-te hmangin nilengin hun hman a ni.

National Sports Day hi Indian hockey player ropui Dhyan Chand pian champhaah India ram pumah hman ṭhin a ni a; niminah khan Mizoram hmun hrang hrang - sikul leh college-ah te, NCC leh NSS te, district hrang hranga Sports department pisa leh Khelo India Centre-ahte hman a ni bawk.