IPR Minister-in MIS officer-te a fuih

Information & Public Rela-tions minister Dr Vanlalthlana chuan nimin khan IPR conference hall-ah Mizoram Information Service (MIS) officer-te tana buatsaih 'In-House Training for MIS officers' a hawng. Minister chuan, sorkar thuchhuakte chu rintlaka ruat a nih avangin dik leh felfai taka ziah tum turin a chah.

Dr Vanlalthlana chuan, social media kaltlanga thu belhchian dâwl lo leh mipui tichiai thei vawrh darh a nih chánga mipui ngaihven ber chu IPR thuchhuah a nih thu a sawi a, "Mipui hriat turte puanzar kawngah media platform hrang hrangte ṭangkai takin hmang chhunzawm zel u la, sorkar thuchhuakte hi rintlaka ruat a nih avangin dik leh felfai taka ziah tum ang che u," a ti.

MIS officer-te chu thiamna chhuak tharte hmang ṭangkai thei tura insiamrem thiam tur leh sorkar duh dan leh hmachhawpte hlen chhuah a nih theih nan ngaihtuahna seng turin Minister chuan a chah a, "Hmasawn turin phùrna leh zir chian peihna rilru put hmasak a pawimawh," a ti. Optic fibre hmangin district khawpuite chu internet chak zawk pek tuma hmalak mek a nih thu a sawi bawk.

In-House Training for MIS officers hi IPR director C Lalnunkima'n a kaihruai a; IPR secretary Betsy Zothanpari Sailo bakah, district hrang hranga MIS officer-te leh IPR directorate-a officer-te an tel.

Nimin khan Advertisement Rules, Mizoram Journalists' Welfare Society, Mizoram Journalists' Pension Scheme, press clipping, RTI Act, Citizen's Charter, Right to Public Services Act, Establishment Matters, DDO-te tih tur leh mawhphurhna leh sum enkawl kaihhnawihte zirho a ni a; vawiinah public relation, press release, govt media relation, social media & fake news leh mental health chungchangte zirho leh a ni ang.