Aizawlah HIV vei hmuh zat a tlahniam

Aizawl District AIDS Prevention and Control Committee chu nimin khan chairman Lalhriatpuia, Aizawl bawrhsap hoin 'IEC Campaign on India Fight against HIV/AIDS and STIs’ kalpui dan tur rêlin an ṭhukhawm; Aizawl khawpuiah kum 2018-2024 chhungin HIV vei hmuh thar zat a tlahniam hret hret tih tarlan a ni.

Ṭhutkhawma tarlan danin, Aizawl khawpuiah kum 6 vel chhung, 2018-2024 inkar khan chhinchhiahna hrang hrang aṭangin HIV vei hmuh chhuah thar zat a tlahniam hret hret a; kum 2018-19 khan HIV vei mi 2,141 hmuh chhuah a nih laiin, kum 2023-24 ah chuan mi 1,373 hmuh chhuah a ni. HIV vei kai zinga 64.4% chu mipat hmei-chhiatna aṭanga kai an ni.

Aizawl DC Lalhriatpuia chuan, HIV hrik darh zel tur venna tura beihpui thlakna, 'IEC Campaign on India Fight against HIV/AIDS and STIs’ chhungin HIV hrik inkai darh dan leh a inven dan bakah, HIV vei tawhte ṭha taka enkawl an nih theih nan inzirtir a pawimawh thu a sawi a; campaign hian Aizawl khawpui pawn thleng a tuam theih nan ruahmanna kalpui a ṭul thu a sawi bawk.

Ṭhutkhawmah hian September 2024 chhunga IEC Campaign on India fight against HIV/AIDS and STIs kalpui turah zirtirna keng tel inelna - debate, quiz, placard making competition, photo booth making competition, flash mob dance competition leh rally buatsaihte an rel a ni.