Task force kuhmùma párah sorkar puh

ZPM ṭhalaite chuan, Covid-19 hripui chungchangah MNF kaihhruai Mizoram sorkar chu kohhran, tlàwmngai páwl leh local/village task force-te kuhmûma pàr tumah an puh.

Nimina ZPM Ṭhalai thuchhuah chuan, "MNF vice president Pu Lalthlengliana'n hripui do chungchanga che ṭha bik anga Mizoram sorkar a fak chu kohhran, NGO leh VTF/LTF-te kuhmûma pâr tumna niin kan hria a, zah theih loh thlak kan tiin, mi dang kuhmûma pára insawitheih bak MNF hian thiam an nei lo niin a lang," a ti a; Lalthlengliana thusawi chuan hripui donaa páwl hrang hrangte thawhhona a tihchhiat an hlauh thu a tarlang.

Inkhàrkhip khirh lai leh hri lèn zual laiin Mizoram sorkar hmel hmuh tur awm loin, task force-te'n nunna hlàn khawpin hripui an do a, dan bawhchhia sum chawitir tur erawh chuan sorkar a indaih leh hle si nia sawiin ZPM Ṭhalai chuan, "Hmun tinah police hmuh tur an awm leh lawi si. A rálmuang chin chiaha chê leh a hlauhawm laia nunna hlàn khawpa civil mite hmatheh leh si sorkar hi khawvelah Mizoram sorkar chiah a awm a ni," an ti.

ZPM Ṭhalai chuan, hripui do chungchangah kohhran leh tlawmngai pawlte leh mi thilphal tam takte avang chauhin Mizoram sorkar a mualpho lo nia sawiin, "Mi ramah chuan hripui vanga harsatna denchhenin sorkarin a mipuite a ṭanpui a, Mizoramah erawh chuan ṭanpui rawn ngai khawpin sorkar a tâlbuai a ni," an ti a; mipui ṭawngṭai chhànna chu MNF party-in an chapopui nia an hriat thu an sawi.

ZPM ṭhalaite hian task force-a duty vanga thite sorkarin a ràlna chu beitham an tih thu sawiin, siamṭha turin Mizoram sorkar an ngen a; Covid-19 vaccine a awm huna la hmasa tur zingah hripui donaa a hmatáwnga awm task force member-te telh ngei turin an phût bawk.