Aizawl bazarpui in sak mek enfiah

Mizoram State Project Monitoring Committee (MSPMC) team B leh C-te chuan August 28, Nilaini khan Aizawl bazarpuia dawr leh thlai thar zawrhna hmunpui tur, Aizawl City Centre leh Aizawl City Centre Annexe sak hna thawh mek an enfiah.

MSPMC team pahnih hi vice chairman Lal Rinawma'n a ho a; nodal department leh contractor-te chu chak zawk leh ṭha zawka hna kalpui dan tur te, an harsatna leh harsatna sutkian dan turte an sawipui a ni.

Aizawl City Centre sakna atan Aizawl Smart City Limited aṭangin cheng vbc 42.82 ruahman a ni a, contractor chu Lushai Engineers a ni. January 2023 khan hna thawh ṭan niin, November 30, 2025-a sak zawh tura ruahman a ni a; hna thawh tur aṭangin 38% vel zawh a ni tawh.

Aizawl City Centre Annexe chu Congress sorkar laia programme an siam New Economic Development Programme (NEDP) sum cheng vbc 36.41 hmanga sak a ni a; Commerce & Industries department enkawl niin, contractor chu Lushai Engineers a ni. June 24, 2020 khan hna thawh ṭan a ni a, 75% vel an zo tawh a ni.