Green-Ag project kalpui dan thlirho

Mamit district bawrhsap Jacob Lalawmpuia kaihhruaiin nimin khan DC conference hall-ah sorkar hotute'n Green-Ag project kalpui dan leh hmachhawpte sawiho a ni a; Annual Work Plan & Budget (2024-25) atan cheng vbc 9.8 leh Mamit district bik tana duan Green Landscape Management Plan (GLMP) an pawm.

Ṭhutkhawma tarlan danin, kumin atana Mamit district-a Green-Ag project hmachhawp langsar zual zingah aieng leh vaimin chìn te, aieng sawngbawlna din te, ran chaw herna thawm ṭhat te, ruahtui khawlna (water harvesting structure) siam te, sangha dil siam te, tualchhung sangha tihpun te, environment kaihhnawih ni pawimawh bikah painting & drawing competition huaihawt te, soil testing kit hmanga lei ṭha leh ṭha lo endikte a tel.

Green-Ag project hi Lunglei leh Mamit district-a khaw 38-ah ram hectare 8972.1 vela zauah kalpui mek a ni a; Mamit district-ah hian West Phaileng RD Block hnuaia khaw 20, Zawlnuam RD Block leh Reiek RD Block hnuaia khaw pahnih ve veah kalpui a ni.