KHAWTHLIR

KṬP-in thisen pe

KṬP, Edenthar Vengchhak Branch chuan nimin khan an kohhran hall-ah thisen pek huaihawtin, Synod Hospital tan thisen unit 27 an pe a, petute mipa 21 leh hmeichhia paruk an ni.

Home 2 tlawh

Mizoram State Commission for Protection of Child Rights (MSCPCR) chuan nimin khan naupang enkawlna (child care institution) pahnih - Dvora, Saron Veng leh Gan Sabra, Luangmual an tlawh. Dvora-ah hian hmeichhe naupang 25 an enkawl mek a, Gan Sabra-ah hian naupang 52 an awm mek bawk. MSCPCR hotute chuan thawktute chu an inpekna thûk tak chhawm nung zel turin an chah a ni.

Khuh damdawi man

Central YMA Kumpuan Committee leh Health department-a Food and Drug Administration duty-te chuan August 28, Nilaini khan Aizawl Transport Courier Godown-ah Mizoram páwn aṭanga phurh luh khuh damdawi (Codeine syrup) bûr 53,100 an hmu chhuak a; dan bawhchhiat a awm leh awm loh endik turin Drugs Rules, 1945 hnuaiah hrên zui a ni.

Sangha no sem

Saitual district-a khaw panga - Thanglailung, Phullen, Luangpawn, Phuaibuang leh Khawlianah nimin khan Fisheries department chuan sangha no an sem. Fisheries department hian kumin fûr chhungin Saitual district-a sangha khawitute hnenah sangha no 7,00,000 vel an sem tawh a ni.

PMMVY-ah mi 113

Hmeichhiate venhim leh chawikanna lama hmalakna, Mission Shakti hnuaia Serchhip District Implementing Committee chu an chairman Paul L Khuma, bawrhsap hoin nimin khan an ṭhukhawm. Pradhan Mantri Matru Vandana Yojana hnuaiah sorkar kum kal mek 2024-25 chhungin mi 113 hnen­ah ṭanpuina pek a nih tawh thu tarlan a ni.