Mizoram pumah Kawṭhalo do Beihpui thlak a ni dawn

Nimin khan Mizoram hmun hrang hrangah khawṭhalo do beihpui thlakna 'Intensified Diarrhoea Control Fortnight (IDCF)' hawn a ni a, Aizawlah chuan Aizawl Civil Hospital-a Paediatric OPD-ah Health minister Lal Thanzara'n a hawng.

Lal Thanzara chuan National Health Mission in a tum pawimawh ber pakhat chu naupang thihna tih tlem a ni tih sawiin, "Kawṭha lo hi naupang kum nga hnuai lam thihna 10% thlentu a nih avangin kawṭhalo dona programme kalpui hi thil ṭul tak a ni. Kum 2014 aṭanga ṭanin kaw-
ṭhalo do beihpui hi kum hnih kalpui a ni tawh a, a hlawhtlin avangin zawngchhang thlak hlein sorkarin a hria a ni," a ti.

Health minister chuan fur tui tam laia hluar bik kawṭhalo dona atan July 11 aṭanga 23 thlan a nih thu sawiin, IDCF 2016 thu ken ‘Kawṭhalo vanga naupang thihna pumpelh’ chu a hlawhtlin ngei theihna atan mipuite thawhpuiah a sawm.

IDCF hawn inkhawm hi Health principal director Dr. K Ropari'n kaihruaiin, RCH state programme officer Dr. Vanlalsawma'n IDCF beihpui thlak dan tur a sawifiah.

Kumin hian Social Welfare, PHE, School Education, AMC leh V/C te nena thawkhoin middle school zawng zawngah fortnight denchhen hian nitin sikul naupangte kutsil dan dik zirtir an ni dawn a, Mizoram chhung hmun hrang hranga damdawi-in leh anganwadi centre thlan bikah Zinc-ORS corner siam niin a thlawnin Zinc leh ORS a lak theih dawn a ni.

ASHA ten naupang kum nga hnuai lam awmna in zawng zawng an tlawhchhuak dawn a, ORS leh Zinc an sem pahin faina leh thiang-hlimna chungchangte, kawṭhalo enkawl dante leh damdawi-in pan a ṭul hunte hrilhin, kutsil dan dik an zirtir nghal ang.