Zoramthanga'n remna palai hna a thawhdan a sawifiah

MNF president Zoramthanga chuan nimin khan Mizo Hnam Runah thu sawiin, July 4-9 chhung-a Myanmar remna palai hna a thawh chungchang a sawifiah.

Myanmar underground pawl hrang hrangte'n India leh MNF inremna chu mak an tih bakah an ngaihsan thu sawiin Zoram-thanga chuan, "Kan founder president Pu Laldenga finna leh remhriatna, India constitution a dai khalh thiamna ropui an ti hle. Mizoram inremna hi chip chiar taka hriat an duh a ni," a ti a, India constitution-a Mizoram Peace Accord dah luh a nih dan a sem thu a sawi.

MNF President chuan 'MNF leh India sorkar inremna hi engtin nge India constitution-ah in thun tir nghal mai theih' tih an zawt nasa tih sawiin, "Inremna sign hnan zingah ‘sequence of events’ tihah, no. 4-ah ‘Inremna tihfel a nih veleh he constitution bill hi parliament-ah putluh a ni ang a, Mizoram pawh state nihna pek nghal a ni ang,’ tia ruahmanna sign hnan lâwk vek a nih thu ka sawi a, ropui an ti hle," a ti.

Zoramthanga chuan MNF leh India sorkar inremna ang chu Myanmar underground-te'n neih an huphurh deuh nia sawiin, "Mizorama lo kal a, a hmun ngeiah chiang lehzuala zir an chak. MNF chuan political demand kan siamin a duh apiangin (Kohhran leh NGO) ngaihdan leh rawtna an neihte thawh turin sawmna kan siam thute ka sawi a ni," a ti a, MNF leh India sorkar inremna ropui an tih thu a sawi.

MNF thuchhuah tarlan dan-in, Zoramthanga hi Thailand-a Chiangmai khawpuia Myanmar underground leh sorkar inbiakna kal zelah, an political demand an tih thiam theih nana, ‘Workshop on Federalism’ an siama tel tura zin a ni ber a, hetah hian Myanmar underground ‘Ethnic Nationalities’ inti deuh bik underground group 17 aiawh, mi 40 an tel a ni.