MZP-in ITI-a result fel lo awm chingfel turin thuneitute an phut

MZP chuan thu-chhuah siamin, Industrial Training Institution (ITI), Aizawla hnuaia stenographer tur kum 2014-2015 batch, second semester August 13, 2015 a exam-te result felfai lo chinfel a la ni lo nia sawiin, result felfai tak tichhuak turin thuneitute an ngen.

MZP tarlan danin, ITI-ah hian August 13, 2015 khan mi 18 in stenographer second semester an exam a, an vai hian mark pakhatmah hmu lo anga tarlan an ni.

Mi 18 zinga tumah-in mark an hmu lo chu mak an tih thu sawiin MZP chuan, "Zirlaite tih dik loh a nih leh nih loh pawh Mizoram chhungah finfiah theih a ni tawh si loa, a buaithlak hle. ITI-a zirlai training-ten result chung-changah harsatna an nei leh ṭhin hi pawi kan ti a, zirlai training-te'n a bikin result chungchanga harsatna an tawh ṭhin sukiang tura hmala turin thawktute kan ngen a ni," an ti.

An pawl rorelna sang Federal Council Sitting neih zawh taka 'Sorkar hnathawk mahni post-a awm lote an post-a an awm vek theih nan hmalak ni rawh se' tia an rel chu chak taka bawhzui nghal a nih thu sawiin MZP chuan, "Sorkar hna-thawk mahni post a awm lote chu anmahni post ngei a awm vek turin kan ngen," an ti a, sorkar hna-thawk mahni post a awm lo hriate chu an hnen-a thlen turin an hriattir.