Adhaar card-ah ngaihhnathiam dil. Gas tihchingpenah complaint dawng lo
Gas subsidy atana Adhaar card thehluh kher phut a nih tak avangin Mizoram sorkar chuan ngaihnathiam tura ngenna sorkar laipuiah a thawn. Hetihlai hian Legal Metrology hotute chuan, gas tihchingpen complaint tun hnaiah an dawn tawh loh thu Vanglaini an hrilh.
Vanglaini palai zawhna chhangin Food Civil Supply & Consumer Affairs (FCS&CA) dept. hotute chuan, July 2016 aṭanga Adhaar card thehlutte hnenah chauh gas subsidy pek an ni ta leh, September 30, 2016 hmaa Adhaar card thehlut lote hnena gas subsidy pek an nih tawh dawn loh avangin nimin khan Ministry of Petroleum & Natural Gas hnenah ngaihnathiam tura ngenna an thawn tih an sawi.
FCS&CA hotute chuan ngaihnathiamna hi hun biktuk awm loin, a theih ang rei atan an ngen thu an sawi. FCS&CA hotute chuan ngaihnathiamna hi dil ni mah se, Adhaar card thehlutte hnenah chauh gas subsidy pek hi hman hun a la awm dawn tho avangin, mipuite'n inthlahdahna atan hmang loin, Adhaar card hi gas distributor-te hnenah thehlut ngei se an duh a ni.
Legal Metrology hotute'n Vanglaini zawhna chhanga an sawi danin, gas distributor-te hnenah an kudama gas dahluh a nih dawn leh gas hralh chhuah a nih dawna buk zel tura an hriattir hnuah gas tihchingpenah complaint an dawn tawh loh thu an sawi a, "Tun hnaiah chuan gas buk tling lo man pawh kan nei tawh lo," an ti.
Gas distributor-te'n an kudama dah tur gas a thlen chiahin anmahni an hriattir nghal thu sawiin Legal Metrology hotute chuan, "A theih ang angin kan buk pui a, mahse mihring indaih lohna avangin duh angin kan buk pui kim thei lo," an ti a, gas buk tling lo leh ṭha tawk lo a awm a nih chuan gas distributor-te'n IOC-ah an thawn let zel tur a nih thu an sawi.
Legal Metrology hotute sawi danin, tunah chuan gas sem a nih dawnin a semna hmunah buk zel tur a ni a, buk tling lo a awm a nih chuan a tlin lohna zat anga hralh tur a ni a, pawisa chawi ngai chu gas distributor-te'n an chawi tur a ni. Hetiang a nih avang hian gas distributor-te pawhin an kudama gas dah a nih dawnin an buk uluk tawh hle.
Gas tihchingpen a reh theihna atan mipuite'n gas an lak dawnin buk phawt duh ṭhin se an duh thu sawiin Legal Metrology hotute chuan, "Gas buk thlapa mipuiin an la a nih chuan tihchingpen tur nasa takin a veng dawn a ni. Gas distributor-te'n gas buk tling lo an dawng duh dawn loa, gas distributor-te'n an dawn duh loh chuan driver-te pawhin an tichingpen ngam dawn lo a ni," an ti.
June 29, 2016 khan FC&SCA secretary Dr. Franklin Laltinkhuma kaihhruaiin, Secretariat conference hall-ah Mizorama eirawngbawlna gas leh tuialhthei sem dan leh a kaihhnawih hrang hrang sorkar department hrang hrang hotute leh Aizawl City Local Council Association, Central YMA, Mizoram Consumer Union (MCU) leh Gas Distributor Association hruaitute'n an sawihoa, resolution an passed a ni.
Meeting-a tarlan danin, Marketing Discipline Guidelines 2014 for LPG Distri-butors-a a lan dan chuan, gas bûr phurh chu bottling plant aṭanga distributor-te kudam inkar zawng chu transporter-te mawhphurhna a ni. Distributor-te'n transporter-te hnen aṭanga an dawn fel hmain a bûk tlin leh tlin loh leh a him dam dan an enfiah tur a ni a; dan ang chuan 10% tal an check tur a ni.
Meeting resolution
1. Khua/veng tina gas distribution point-ah gas cylinder bûk vek a ni ang. Bûk tling lo chu distributor-te'n an la let leh ang a, company-ah an thawn lêt tur a ni. An thawn letna lehkha copy FCSCA department-ah an pe ang a, bûk tling lo chu customer-te hnenah sem theih a ni lo ang.
2. Gas distributor-te'n transporter-te hnen aṭanga gas an dawnin uluk takin an bûk ang a; distribution point-a bûk tling lo hi distributor-te mawh a nih avangin uluk takin gas bûrte bûk se.
3. Danin a phût anga India ram hmun danga an tih dan angin, advance booking, etc. hi pilot project angin veng pakhatah enchhin ni se.