Kan thil tum kan thlak ve ngai lo - MPC President

MPC president Lalhmangaiha chuan, an party chuan engtik lai mahin political leh economic lama hmasawn-naah an thil tum an thlak ve ngai loh thu a sawi.

Lalhmangaiha hian nimin khan an party office-ah thu sawiin, "MPC hian sorkarna a chelh ve ṭhin tawh, election pawh vawi tam contest ve tawh a ni. Political lamah emaw economic hmasawnna lamah kan thil tum leh kalpui tum dan thlak ngai lo pawl kan ni. PC party leh PC sorkar hmalakna chhuanawm tak takte - hnam humhalhna, ram hmasawnna leh vantlang nun siamna tiin a ṭhen theih ang," a ti.

Hnam humhalhna lamah, 'kan ram kan hnam kan sakhua a him tur a ni,' tih chu an thupui a ni tih sawiin MPC President chuan, "Kan thupui hi kan vawng reng a, kan vawng reng zel dawn, a finfiahna chu MPC ṭha-laite hnathawhah a hmuh theih a ni," a ti a, tun hnai maiah khan ILP chung-changah an party ṭhalai-te'n hma an lak thu a sawi.

Lalhmangaiha chuan eizawnna kawngah chimrala kan awm loh nan inven a ṭulzia Mizo mipuite rilrua tuhtu chu an party an ni tih sawiin, "Hemi kawngah hian he political idealogy-a inkaihhruaina leh kan ṭhehdarhah hian kan hlawhtling a ni. Vawiinah chuan kan mipuite thinlungah he political idealogy hi a intuh nghet viau tawh a ni. Mah se, sorkar kan hrawn ṭhinte hian ILP an kenkawhna lamah duhthu a sam lo hle," a ti.

MPC President sawi danin, ramri humhalhna kawngah Mizoram ramri dik tak humhalh tura hmalakna awmze nei taka kalpui a, Boundary Commission dintu chu an party an ni a, kum 1984-a PC sorkar a tawp tak hnuah Assam nena ramri buai ching fel turin tih -takzeta hmalaknaa awm tawh lo.