Rel station-ah ILP checkgate dah phût

13th July, 2016

MPC ṭhalai leh ZNP ṭhalaite chuan, nimin khan ZNP office-ah thuthar thehdarhtute kawmin, Bairabi rel station-ah ILP checkgate a awm loh thu an sawi a, "Terminal chhungah ILP checkgate siam ni ngei se kan duh," an ti.

MPC ṭhalai president V Lal-
ṭhazuala chuan party pahnih ṭhalaite chuan July 6 khan Bairabi rel station an tlawh tih sawiin, "Bairabiah zan dar 8:30 ah rel lo thlengin zing dar 5:30 ah a chhuak leh ṭhin. Rel lo thlen lai tak hian a hmunah kalin station master leh hnathawktu dangte kawmin thil awm dan kan zir a ni," an ti a, an zirchiannaa an thil hmuh chu Mizoram tana him loa an hriat thu a sawi.

V Lalṭhazuala sawi danin, Bairabiah hian rel hi ṭum khatah compartment 12 a lo thleng tlangpui a, compartment pakhatah seat 90 awmin, a khata passenger an chuan chuan ṭum khatah mi 1080 an chuang thei. Rel station bul hnaiah ILP check gate a awm lo a, ILP nei lote duh duhin an kal darh thei a ni.

Hetiang a nihlai hian Bairabi SDC chuan a hmunah ṭhut chilh loin, Kolasib aṭangin a vil a, chuvangin Bairabia rel lian lut chu party ṭhalai pahnihte chuan Mizoram tan a him loin an hria a ni.

Rel lian chi a rawn lut tur hre lawk sia, ILP check dan tura ruahmanna siam a ni lo chuan mipui tan sorkar a thlamuanpui awm lo tih sawiin MPCY President chuan, "Mizorama sorkarna chelhtute hi mikhual party an nih avangin Mizo hnam himna an ngai pawimawh tawk loin kan hria a ni," a ti.

ZNP ṭhalai president Lalmuan-puia Punte chuan, Rio Olympic lo awm tura India aiawha hockey-a tel tura beisei H Lalruatfeli a tel pha dawn lo tih sawiin, "A pawi kan ti hle. Mizoram sorkarin Vision 2016 meuh siam a an buaipui laia Mizo pakhatmah Olympic-a an tel lo tur hi sorkar chak tawk loh vang liau liau a ni," a ti a, Sports Minister chu a chanvo chelh tlak zela an ngaih loh thu a sawi.

Lalmuanpuia Punte chuan Sports Minister chu manhni thuin bang ngam se an duh tih sawiin, "Ama thua a bang phal lo a nih pawhin kan Chief Minister hian ṭhalai MLA leh minister dang a neihte hian thlak mai se, a ṭha turah kan ngai," an ti.