Centre for Science & Environment thlir dan: Aizawl khawpui a fai ṭha Bawlhhlawh sawngbawl la mumal lo

Centre for Science & Environment (CSE) chuan, Aizawl khawpui chu India rama khawpui fai berte zinga mi a nih thu a tarlang a; chutih rualin, bawlhhlawh sawngbawl dan a la mumal loh thu tarlan tel a ni.

CSE hian India rama khawpui hrang hrangte fai dan leh bawlhhlawh sawngbawl dante a hmun­ah kal chilhin an lo zir chiang tawh a; zir chianna aṭang chuan Aizawl chu India rama khawpui fai berte zingah a puang a ni.

CSE hian July 11, 2016 zan khan New Delhi-a Jacaranda Hall, Indian Habitat Centre-ah CSE Cleanest City Award hlanna inkhawm a buatsaih a; Union Urban Development minister M Venkaiah Naidu-a'n a dawngtute hnenah a hlan.

CSE hian Alappuzha (Kerala), Panaji (Goa) leh Mysuru (Karnataka)-te chu India rama khawpui fai berah a thlang a a, fai ber dawttu (second best) khawpui panga zingah Aizawl a tel.

Aizawl nena huang khata an dahte chu - Bobilli (Andhra Pradesh), Pune (Maharashtra), Surat (Gujarat) leh Suryapet (Telangana) te an ni.

CSE director general Sunita Narain chuan, khawpui fai an tehnaah hian khawpui fai leh thianghlimna chauh ni loin, bawlhhlawh sawng­bawl dan ṭhat leh ṭhat lohte nen a kal kawp vek tih a sawi a; Aizawl chu India rama khawpui fai berte zinga mi a nih thu a sawi rualin, "Bawlhhlawh sawngbawl dan a la ṭha tawk lo a, a la mumal lo a ni," a ti.