Tribe list siamṭha tura chak zawka hmalak duh

Mizo Students’ Union (MSU) chuan, India Con-stitution-a Mizoram tribe list inziaka fuh tawk lo tihdanglam a nih theihna atan chak leh zuala hma la tura sorkar an duh thu an tarlang.

MSU chuan Mizoram tribe list inziak fuh tawk lo chu an ngaihmawh thu sawiin, "Mizoram Tribe list siamṭhat a nih theihna atana sorkar hma lo lak tawh dante chu theihtawpin kan zir chiang a, hmalakna hrang hrang a lo awm tawh hi a lawmawm kan ti hle. Chutih rual chuan an hmalakna tichak lehzual turin sorkar kan duh a, thuneitute pawh kan sawipui tawh a ni," an ti.

Tuna India Con-stitution-a Mizoram Tribe list awm hi, ‘The Constitution (Scheduled Tribe) Order 1950’ anga dah a la ni ngar ngar tih sawiin MSU chuan, "Hetah hian felhlel leh dik hlel, tun hnua siam-
ṭhat ngai tur a awm nual tawh a ni," an ti a, sorkarin Mizoram Tribe List siam-
ṭha tura hma a laknaah Zofa hnam peng hrang hrangte’n lung dam taka an pawm tlàn theih tur ngeia hma la tura sorkar an beisei thu an sawi.

MSU tarlan danin, ‘The Constitution (Scheduled Tribe) Order 1950’-a Mizoram tribe list ziah danah hian serial no. 10-naah Any Mizo (Lushai) Tribes tia ziah a ni a, hetah hian Lushai (Lusei) chauh hi Mizo anga ngaih theih a nih avangin hnam inpumkhatna leh inunauna a nghawng thei a ni. Hei bakah hian Serial No. 5 leh 15-ah Hmar chi peng leh Paite chi peng tar lan a nih laiin, serial no. 7-a Kuki Tribes list ziahah Hmar leh Paite chi peng
ṭhenkhat dah a ni.

Engtik lai maha Zofa ni ngai lo, Zofate nena thisen inzawmna nei lo ‘Riang’ (Tuikuk) chu Kuki tribe-ah [Sl. No. 7 (xxviii)] dah a ni tih sawiin, "Tribe ṭhenkhat hming ziah dan (spelling) dik lo a awm nual bawk niin a lang," an ti.