Kawlphetha megawatt 2,411 siam turin Mizoram sorkarin MoU 9 a ziak tawh

Power & Electricity changtu chief minister Lal Thanhawla chuan, Mizoram sorkarin kum 2008-2015 chhungin power project siamna atan inremna thuthlung (memorandum of Understanding) pakua a ziah tawh thu a tarlang. Chu'ng power project pakuaa kawlphetha siam chhuah theih zat chu megawatt 2,411 a ni.

CM Lal Thanhawla chuan, power project pakuaa Mizoram sorkarin MoU a ziah tawhah hian, kawlphetha siam chhuah a nih hunah Mizoramin a thlawnin 12% zel a chan tur thu a tarlang a; local area development fund pawh 1% zel Mizoramin a chan dawn thu House a hrilh.
Zawhna dang chhangin, Chief Minister chuan, MoU ziahpuite chu competitive bidding hmanga thla an ni lo tih tarlangin, "Hydro Electric Policy of Mizoram 2010 angin MoU Route hi kalpui a ni," a ti a; project cost chu tunah chiang taka hriat theih a nih loh thu te, hna thawhna tur sumte chu developer-te tum vek tur a nih thu a tarlang.
CM Lal Thanhawla chuan, "Project hrang hrangte hi MoU ziah a nih dan chuan clearance ngai zawng zawngte lak fel a nih aṭanga thla 18 chhungin hna ṭan tur a ni a. Hna thawh ṭan aṭanga kum sarih chhunga thawh zawh tura ruat a ni. Tun dinhmunah beisei angin hnathawh a chak lo a, chuvangin Mizoram sorkarin developer-te hi thla tin an hmasawnnate hriattir zel turin a nawr reng a ni," a ti.