A tlaran zawnga sum hmanga sorkar puh
MNF president Zoramthanga chuan Ningani zan khan khan Hmunpui khuaa vantlang inkhawmah thu sawiin, Congress sorkar chu a tlaran záwng hlira pawisa hmang ṭhinah a puh.
Zoramthanga chuan, MNF-in kum 10 sorkarna a chelh chhunga plan fund chawhrual chu kum tin cheng vbc. 525 vel a nih laiin, Congress sorkar kum ruk plan fund chawhrual chu cheng vbc. 1600 vel a a nih thu a sawi a, "Hetiang a ni chunga mi dum lám ang maia an hnung tawlh zar zar mai hi neitu thinlung an put loh vang a ni," a ti.
Congress sorkar chu motor thar leh helicopter nena inchhek-arbáwmah puhin Zoramthanga chuan, "Plan budget pawh hei zozai a pung chung hian contractor leh mimal hnena an leiba chu cheng vbc. 500 chuang a ni. An sum hmuh ang hi chuan ram enkawl a châkawm lutuk mah se, a chî tur min pekte thlámah an kang puak zel a ni," a ti a; Congress sorkar chuan pawisa an neih loh avangin chhiah an tipung ta vak vak mai niin a sawi.