Lunglei dist-a Bru lak let dan tur sawiho

Supreme Court thupek bawhzuiin nimin khan Home department-a additional secretary Lalbiakzama hoin Lunglei DC office-ah Tripura transit camp aṭanga Lunglei district-a Bru chhungkaw 233 lak let dan tur sawiho a ni.

Lalbiakzama chuan, Supreme Court-in order a chhuah avangin Bru lak let hna chu uluk tak leh fimkhur taka kalpui a ngaih thu a sawi a; Lunglei district hotute chu a bik taka Bru lak let dan buaipui tur bik sorkar official inruat tur leh mamawh tur zawng zawng kim taka ngaihtuahhoa inpuahchah turin a chah.

Home department under secretary leh OSD David H Lalthangliana chuan, Bru lak letna tura sorkar hmalak tawh chinte a sawi a, "Bru lâk letna turin Road Map-IV siam tawh a ni a, sum mamawh zat tur pawh sorkar laipuiah thehluh tawh a ni," a ti.

David H Lalthangliana chuan, District pathum - Lunglei, Kolasib leh Mamit district-a Bru lak letna tura ruahmanna leh senso tur chu State Core Comittee hnenah thehluh tur a ni a, a tul ang zelin Committee-in a ngaihtuah dawn tih a sawi bawk.

Lunglei district chhunga Bru kîr leh tura beisei chhung­kaw 233-te chu khaw panga - Buknuam, Putlungasih, Dinthar, Zohmun leh Chawilung South khuaahte an awmna tur ngaihtuahsak a ni dawn. Lak let hnua an chenna turah DC hoin a kaihhnawih department hotute leh khaw pangaa V/C leh NGO-te'n ruahmanna an siam dawn a ni.