Assembly session-a zawhna chhanna inkalh

MNF member Lalruatkima chuan, chhiah tihpun chungchanga Assembly session-a a zawhna siam tawhah chhanna inkalh a awm thu a sawi. Hetih lai hian, Land Revenue & Settlement minister R Romawia chuan, biak-in leh thlanmuala chhiah lâk tawh, an tihtawp lailâwk mek chu a kalpui zel dan tur ngaihtuah mek a nih thu a sawi.

Revenue minister R Romawia chuan Lalruatkima zawhna chhangin, The Mizoram Land Revenue Laws chu department-in ennawna siamṭhat ṭul a ti a, ennawn tum mek a nih thu a sawi a, "Revenue chhiah chi hrang hrangte hi department chuan ennawn a tum mek," a ti.

Biak-in leh thlanmuala chhiah lak tura tih chungchanga zawhna chhangin, R Romawia chuan, "Biak-in leh thlanmual chhiah lak hi suspend a ni a, kalpui zel dan tur ngaihtuah mek a ni," a ti.

R Romawia chuan, Revenue chhiah lakah, pung nasa lutuk a awm chuan Revenue department-ah complaint thehluh ni se a duh thu a sawi a, "Chhût sual palhte pawh a awm ṭhin a ni," a ti a, Revenue departmnent pawhin 'Kan tih chu kan tih' tiin ṭang tlat lo se a duh thu a sawi.

Revenue Minister chuan, biak-in ram chhung hman dan a inang lo hle tih sawiin, "Ṭhenkhatin sum hmuhna atan, sumdawnna hmun atante an hmang a... angkhat veka tih a remchan lohnate pawh a awm. Ngaihtuah ngun ngai tak a ni," a ti. June 27, 2014-ah chhiah tihpunna thupek (government gazette) tihchhuah a nih thu a sawi bawk.

Zawhna neitu Lalruatkima chuan, July 10, 2014-a Assembly session-a a zawhnaah, chhiah (leiman) tihpun tum a nih thua chhan a nih thu a sawi a; chutih laiin, November 11, 2014-a chhiah tihpun tum a nih leh nih loh a zawh lehnaah, tihpun tum a ni lo, tiin an chhang leh si niin a sawi.