KHAWTHLIR

Sports Policy
Sports minister Zodintluanga chuan MNF member Lalruatkima zawhna chhangin, Sports Policy duan chu sorkarah Drafting Committee-in a thehlut tawh a, mahse duhthusam lo a awm avangin sorkarin a la pawm lo tih House a hrilh. Zawhna neitu Lalruatkima chuan, Sports Policy duan chu July 2009-ah sorkarah thehluh a nih tawh thu sawiin, Sports Minister chu ṭan la turin a ngen.

Taxi 3,489
Transport minister John Rotluangliana chuan MNF member Dr K Beichhua zawhna chhangin, Aizawl khawpuiah taxi service 3,489 a awm thu House a hrilh a; chung zinga permit 82 chu cancel a nih thu a sawi.

Ran endik
Tlabunga AH&Vety department staff-te chuan March 19 khan Kalapani khuaah a thlawna ram damlo entirna hun, Free Animal Health Camp an buatsaih a, ran chi hrang hrang ṭhahnem tak an enfiah bakah, ran vulhtute hnenah a thlawnin damdawi an sem nghal a ni.

Silai pariat man
Champhai Police leh Assam Rifles-te ṭangkawp chuan March 19 khan Champhai leh Zote inkar leilet kawngpuiah Thangdeihpianga (38) s/o Vungkhawnanga, Champhai Vengthar inti hnen aṭangin US siam M-4 A1 Carbine pasarih leh AK-56 rifle pakhat an man a, silaimu 500 an man bawk. Thangdeihpianga hian silaite chu Myanmar aṭanga Ṭiau kam, Ngúr khaw kaltlanga a lak luh a nih thu a sawi.

Resolution pass
Nimina Assembly session-ah INC member T Sangkunga resolution, 'Zofate inpumkhatna dâltu chu engmah tih ni lo rawh se' tih chu sawiho a nih hnuah pass a ni.

Free Clinic
Zoram Entu Pawl chuan nimin khan Tachhip community hall-ah free clinic an buatsaih a, mi 115 hriselna dinhmun endik niin, a thlawna damdawi pek nghal an ni.