World Oral Health Day hmang

Indian Dental Association (IDA), Mizoram State Branch leh National Oral Health Programme (NOHP) ṭangkawp chuan nimin khan Chanmari YMA Hall-ah 'World Oral Health Day' an hmang a, Indian Society on Tobacco & Health (ISTH), Mizoram Chapter president Lal Riliani khuallian a ni.

Lal Riliani chuan, "Zûk leh hmuam kan tih nasat vang te, há leh ka chhung kan duat loh avang­in natna hrang hrang kan insiam chawp ṭhin. Khawvela oral cancer vei zinga 80% hi India mi an ni a, thil pawi leh zahthlak tak a ni," a ti a; doctor-te'n anmahni pantu damlote hnenah zûk leh hmuam ṭhat lohzia zirtir zel se a duh thu a sawi.

World Oral Health Day hmannaah hian IDA leh NOHP-te chuan a thlawna ha entirna an buatsaih a, ha leh ka chhunga insawiselna nei mi 100 chuang a thlawnin an en a ni.