Tui pump kháwl chhia siam ṭha tawh

Cyclone Remal vanga Aizawl khawpui tana tui pump-na kháwl chhia chu siamṭhat a ni tawh a, Guwahati aṭanga Mizorama phurh chhoh turin buatsaih mek a ni.

Vanglaini palai zawhna chhangin PHE minister Prof. Lalnilawma chuan, Cyclone Remal vanga Tlawng lui aṭanga Aizawl mipui tui tlan tur pump-na khawl chhia, Guwahati-a an siamtir chu a ṭha tawh tih a sawi a, "Kan JE leh electrician-te an zuk kal a, August 27-28 khan an test tir a, a ṭha tawh. Tunah hian rawn phurh chhoh turin an inbuatsaih mek. A hmaa an siam khan an siam zawhah kan engineer-te'n an zuk endik a, an test tir hnuah duhthu a sam loh avangin kan siamṭhattir leh a ni," a ti.

Prof. Lalnilawma chuan, tui pump-na khawl chu a rih avangin lirthei lian hmanga phurh a ngaih dawn thu sawiin, "Fûr lai a ni a, leimin tam hun lai a nih avangin an rawn phurh thlen hun tur sawi mai theih a ni lo," a ti a; an phurh thlen hunah pawh pangngai taka tui pump turin hun a duh rei deuh dawn thu leh ruahsur tam lai a nih avangin tui thianghlim pump tur a tam loh ṭhin thu a sawi bawk.