Ration card ennawn mek a ni; 'A dikin ration card i nei ang u' - FCSCA

Food, Civil Supplies & Consumer Affairs (FCSCA) department chuan Aizawl Municipal Corporation (AMC) huam chhungah ration card ennawn mek a nih thu an tarlang a; dik taka ration card neih tum turin mipui an ngen.

FCSCA department hian nimin khan circular tichhuakin, AMC chhunga veng 83 (retailer 153)-ah NFSA Selection Com­mi­ttee kaltlangin ration card ennawn mek a nih thu an tarlang a, "Veng tina dinhmun harsa, chhuanchham thei dinhmuna ding leh khawsak phunga chhawm­dawl ngai te, sawi­­puitu nei ve lo puih ngai ngawih ngawihte tan veng tin NFSA Selection Committee-te rilru zau tak pu turin kan ngen. Aizawl khawpuia ennawn hna thawh zawh a nihah district-ah a tahtawla ennawn leh a ni ang," an ti.

National Food Security Act (NFSA) hnuaia buhfai dawng thei tur dinhmun harsate sorkarin thlauhthlak a hlau hle tih tarlangin FCSCA chuan, "Dinhmun harsate'n an chanvo dik tak an chan ngei theih nan hmalakna kalpui tur a nih avang leh, Mizoram economic status hril tur a nih avangin mi zawng zawng thawhpuiah kan sawm. 'Sem sem dam dam, ei bil thi thi' ti ṭhin Mizo hnam hian ration card dik nei ang u," an ti a; pachhia leh chhawmdawl ngaite'n an chanvo dik tak an chan theihna atana thawhpuiah mi tin an sâwm a ni.