Kum 10 chhungin ISL leh I-League-ah Mizoramin player 192 a thawh - Tetea Hmar

Sports & Youth Services minister Lalnghinglova Hmar chu nimin khan Pragati Maidan, New Delhi-a Physical Education Foundation of India (PEFI) leh Sport India Foundation-in Sport India Conference, 2024 an buatsaihah khualzahawm a ni a; Mizoramin kum 10 chhungin ISL leh I-League-ah player 192 a thawh thu a sawi.

Lalnghinglova Hmar chuan, infiamna chu intihhlimna mai ni lo, ṭhalaite eizawnna leh India ram tihhmingṭhatna hmanrua ni thei turin India ram pum anga inher rem a ṭul thu a sawi a, "Mizoram hi state lian lo tak ni mah se, tun hnai kum 10 chhungin Indian Super League leh I-League-ah player 192 a thawh thei. Grassroot level aṭanga zirtirna ṭha inpek a pawimawh," a ti a, Olympics-a hlawhtlinna thlir chungin tun aṭanga hmalak a ṭul thu a sawi.

India-in kum 2036 Olympic Games thlen a tumna atana inbuat­saih nan Mizoramin June 13-14, 2024-ah Mizoram Sports Conclave a buatsaih thu sawiin Lalnghinglova chuan, "India rama infiamna lâr ber cricket thlauhthla chuang loin, India infiammite ṭhatna Olympic sports discipline dangah nasa zawka ṭan lak a ṭul," a ti.

Lalnghinglova Hmar hi Sport India Conference-a sawihona panel-ah a ṭhu a; Mizoram khua zawng zawng hrût chhuaka sport coaching project lian tham kalpui tum a nih thu leh, infiamnaa theihna nei ṭhate zawn chhuahna project pawimawh tak a nih tur thu a sawi.

Sports Minister chuan, Mizoramah hockey chawi nung leh turin hmalak mek a nih thu sawiin, "Khawvel mithmuha India pho chhuaktu a nih avangin kan ngaih pawimawh zinga mi a ni. Mizoramin hmeichhe hockey-ah nasa taka hma kan sawn laiin, mipa lamah ṭan lak kan la ngai a, theihtawp kan chhuah dawn," a ti.

Sport India Conference-ah hian sports inrelbawlna dikin ram economy-a hmasawnna a thlen theih dan thlirho a ni a, inkhawmpui thupui chu 'Global trends and opportunities in sports management: Impact of professional leagues and sports tourism on economic development' tih a ni. State hrang hranga sports thuneitu te, sport industry leh private organisation te, sport university hotute leh infiamna lama tui mite an tel.

Conference pual hian August 29-31, 2024 chhungin Pragati Maidan-ah Sports India Expo buatsaih a ni a, India ram chhung leh pawna sport industry liante’n an thil siamte an pho chhuak a ni.