R Lalrawna leh Rozama Chawngthu hnenah Bhasha Samman hlan a ni

Bhasha Samman: Sahitya Akademi (National Academy of Letters) chuan mahni ṭawng hmasawnna atana thawh hlâwkte hnena an hlan ṭhin, Bhasha Samman chu August 29, 2024 khan R Lalrawna, Electric Veng, Aizawl leh Rozama Chawngthu, Mission Vengthlang hnenah an hlan.  

Sahitya Akademi chuan Bhasha Samman dawng tura R Lalrawna leh Rozama Chawngthu thlan an nih thu hi kumin June thla khan an puang tawh a, August 29 khan Rabindra Bhavan, Delhi-ah an hlan a ni. Bhasha Samman hian Rs 1,00,000 leh thil dangte a keng.

Sahitya Akademi chuan, R Lalrawna chu Mizo thu ziak lama thawh hlâwk tak a nih thu tarlangin, "Ṭawng lettu a nih bakah zirna hmasawnna atan theihtawp a chhuah ṭhin. Gilzom Publication-ah editor a ni a, Mizo ṭawng hmasawn zelna atan theihtawp chhuah ṭhin a ni," an ti.

Rozama Chawngthu chu thu ziak lamah Mizote tana thawh hlâwk tak a nih thu tarlangin Sahitya Akademi chuan, "Lehkhabu tam tak Mizo ṭawngin a let tawh. Thawnthute pawh a ziak a, Akashvani leh DDK-ahte chan ṭhin a ni," an ti a, zirtirtu ṭha chawimawina a dawn tawh thu pawh an tarlang.

Bhasha Samman hi kum 1997 khan James Dokhuma'n a dawng tawh a, kum 2014 khan B Lalthangliana'n a dawng tawh bawk.