Anthony Vanmawia (L) hnenah huaisen chawimawina hlan a ni

India sorkarin mi dang nunna chhantute hnena huaisen chawimawina a hlan ṭhin, 'Sarvottam Jeevan Raksha Padak 2023' chu Anthony Vanmawia (L), Tuirial Tlangveng hnenah hlan a ni a; nimin khan Aizawl DC Lalhriatpuia'n Anthony-a pu PC Ngursiamliana leh a pi Lalrinpuii te hnenah a hlan.

Sorkar thuchhuah tarlan danin, April 17, 2023 tlaia Anthony Vanmawia (11)-te unau sikul báng chu Tuirial luiah inchiah dai turin an kal a, Tuirial luia Pachuau Li-ah a nau Lalhmunsiama chu a chesual a, Anthony-a chuan a nau chu a chhan chhuak a, amah a thih phah ta zawk a ni.

Aizawl DC Lalhriatpuia chuan, Anthony Vanmawia thil tih chu ropui a tih thu sawiin, "Chhuanawm tak a ni," a ti a; a kalsan tâk a chhungte ngaihsak zui zel turin Tuirial Tlangveng khawtlang hruaitute a chah.

Republic Day 2024 puala chawimawina hrang hrang dawng tur zingah Sarvottam Jeevan Raksha Padak dawng turin mi pathum thlan an ni a; Anthony Vanmawia bakah, Mizoram aṭangin Melody Lalremruati thlan a ni.

Huaisen chawimawina hian medal, chawimawina thuziak leh Rs 2,00,000 a keng a, pawisa hi direct-in Home department-in an bank account-ah a thunsak ṭhin.

Award hlanna inkhawma hian sorkar hotute bakah Tuirial Tlangveng VC leh YMA hruaitu te, Central YMA leh MJA aiawhte an tel a ni.