Inspection & Certification Centre sak mek Minister-in a enfiah

Transport minister Vanlalhlana chuan nimin khan Hlimena lirthei endikna leh certificate pek chhuahna tura ruahman, Inspection & Certification Centre sak mek leh tun hnaia ruahsur vanga harsatnate a enfiah.

Vanlalhlana chuan, Inspection & Certification Centre chu Mizoram tan hmasawnna ruhrel pawimawh tak a nih tur thu sawiin, theihtawp chhuah turin Transport department-a thawkte leh contractor-te a chah a, "Hna ṭha leh tlo, ram leh hnam tana chhawrnahawm tak puitlin a nih theih nan ṭhahnemngai takin hma la ang che u," a ti.

Inspection & Certification Centre hi Ministry of Road Transport & Highways (MoRTH), Mizoram Transport department leh Central Institute of Road Transport (CIRT), Pune, Maharashtra-te'n thawhhona thuthlung (tripartite MoU) an ziah kaltlanga sak a ni a; cheng vbc 15.50 sènna tur niin, sorkar laipuiin 90% leh Mizoram sorkarin 10% an tum a ni. Sorkar laipui aṭangin cheng vbc 5.34 leh Mizoram sorkar aṭangin cheng nuai 54.40 hmuh a ni tawh.

Administrative building leh inspection shed sakna chu e-tender kaltlangin Vinco Construction hnenah pek a ni a, civil work chu kumin financial year chhunga zawh tura ruahman a ni. Sak zawh a nih hunah MoRTH duh dan angin automated testing station (ATS)-ah puan tur a ni a, Mizorama lirtheite fitness chu he hmunah hian khawl hmanga endik tawh tur a ni.

Thawhhona thuthlung ang chuan, Inspection & Certification Centre hi peih a nih hnu kum hnih chhung chu CIRT, Pune-in an enkawl zui dawn a, chumi hnuah Transport department hnenah an hlan dawn a ni.