Mi dang hnena Jordan Centre hlan turin buaipui ngaite buaipui mek a ni

Mizoram sorkar din ruihhlo ngaite enkawlna hmun, Jordan Centre, Seṭhawn chu mi dang kuta hlan (outsource) turin buaipui mek a ni.

Social Welfare department hotute hnen aṭanga Vanglaini thu dawn danin, Council of Ministers-in Jordan Centre chu mi dang enkawltir tura an rêl avangin mi dang hnena hlan turin buaipui mek a ni a; tunlai hian enkawltu tur zawnna expression of interest (EoI) buaipui mek niin, peih ṭêp a ni tawh.

EoI chhuah a nih hnuah Jordan Centre enkawl duhte'n an enkawl duh dan nen an chhang dawn a; chuta ṭang chuan sorkarin enkawl tlaka a ngaih hnenah a hlan ang. Sorkar duh dan anga enkawl duh an awm lo a nih chuan mi dang hnenah hlan (outsource) a ni kher dawn lo.

Hetih lai hian, Jordan Centre hi enkawl duh an awm ngeia hriat a ni a, mahse, an enkawl duh dan hriat a la ni lo a, EoI an chhan hunah hriat a ni ang.

Tarlan tawh angin, June 18, 2024-a Council of Ministers ṭhukhawm chuan, Social Welfare department aṭanga agenda lut, 'A Proposal for ‘in Principle Approval’ for Outsourcing of Jordan Center (De-Addiction & Rehabilitation Center), Seṭhawn' tih chu an sawiho hnuah an pawm a ni.