Minister-in Minority Affairs Minister a kâwm

Minister of state Lalnghinglova Hmar chuan August 29, Ningani khan New Delhi-ah Union Minority Affairs minister Kiren Rijiju a kâwm a, Mizo ṭhalaite’n kut themthiam kawngah theihna sang tak an neih thu a hrilh.

Lalnghinglova Hmar chuan, Mizo ṭhalaite theihna hlawhtlinpui turin Mizoramah skill training centre lian tham din a pawimawh thu a sawi a; Ministry of Minority Affairs hnuaia project awm thei hrang hrangah infiamna (sports) leh kut themthiamna (skill development) lam tihhmasawnna tur project telh ve a pawimawh thu leh, Mizoramin National Games 2032 thlen ngei a duh thu a sawi bawk.

Kiren Rijiju chuan, Ministry of Minority Affairs hnuaia project-ah Mizorama infiamna leh kut themthiamna lam hmasawnna tur tel thei se a duh thu sawiin, Mizoram Chief Minister nen pawh he thilah hian an inkawm tawh thu a sawi a ni.

Sports Minister hian August 29 vek khan New Delhi-a Sports Authority of India (SAI) Headquarters-ah SAI director general Sandip Pradhan a kâwm a; India-in Olympic Games 2036 thlen a tumah Mizoram aṭangin infiammi a tam thei ang ber tel an duh tih sawiin, "Inbuatsaihna pakhat atan Aizawl SAI-ah Mizote ṭhatna leh Olympics-a tel beisei theihna tur chi sport discipline dah belh a ṭul," a ti.

Olympic 2036 Vision pualin Mizoram khua zawng zawng hrûtchhuak tur sports coaching lian tham kalpui tum a nih thu Sports Minister-in a sawi chungchangah SAI Director General chuan, coaching pekna tur sport discipline thlan chhuah chu uluk taka kalpui a ngaih thu leh, coach-te chu a ṭul ang zela training pe turin an inhuam thu a sawi.

Labour, Employment, Skill Development & Entrepreneurship (LESDE) minister Lalnghinglova Hmar hian Ningani vêk khan Ministry of Skill Development and Entrepreneurship (MSDE) secretary Atul Kumar Tiwari chu a pisaah a kâwm a; sorkar laipuiin Industrial Training Institute (ITI) tihhmasawnna tur scheme lian tham a ruahman chu lawmawm a tih thu a hrilh.

MSDE hian PMKVY 4.0 hnuaiah Mizoram tan special project a siam a, March 1, 2024 khan cheng vbc. 31.06 a ruahman. Mizoram State Special Project hnuaiah ṭhalai 10,000 chuang skill training pek tum niin, registration kalpui mek a ni a; centre ṭhenkhat chuan training an kalpui ṭan tawh a ni.