KHAWTHLIR

Thisen pe

Aizawl College NSS leh Red Ribbon Club chuan nimin khan Sikulpuikawna an campus-ah thisen pek an huaihawt a, Civil Hospital Aizawl tan thisen unit 131 an pe a, petute mipa 112 leh hmeichhia 19 an ni. Zemabawk Higher Secondary School pawhin August 29, Nilaini khan an sikulah Civil Hospital Aizawl tan thisen unit 100 an pe a, petute mipa 62 leh hmeichhia 38 an ni.

Aizawlah meth man

Assam Rifles sipaite leh CID (Crime) hnuaia Special Narcotics Police Station-a police-te chuan August 29, Ningani khan Bawngkawn Shalom Vengah mi pali hnen aṭangin methamphetamine mûm 1,00,000 (kg. 9.726) an man a, CID (Crime)-in thubuai an ziak lut. Meth an man hi tualchhunga hralhna ang chuan Rs 33,33,00,000 (vbc. 33.33) hû a ni.

Leimin enfiah

Lunglei District High Powered Committee (HPC) vice chairman V Malsawmtluanga, MLA chuan August 29, Ningani khan Leitlangpui Higher Secondary School leh Lunglei Zohnuaia UPC (NEI) biak-in bula leimin a enfiah. Sikul leh biak-in hmunhma thawm ṭhat ngaite chu HPC sum aṭanga thawm ṭhat a nih dawn thu MLA chuan a sawi.

MYC workshop

Mizoram Youth Commission leh D&C Coaching ṭang dun chuan nimin khan Mizo ṭhalai hna zawng mekte tan thil pawimawhte inzirtirna leh inhrilhfiahna an buatsaih a, mi 151 an tel. Workshop-ah hian English grammar, writing skill, spoken hindi leh soft skill-te inzirtir a ni.

S Vanlaiphai pa luiah tla hlum

C Lalruatdika (30) s/o C Lalengmawia, South Vanlaiphai chu nimin tlai khan Hnahchang luia Zawngek li-ah a tla a, nizan dar 7:30 thleng khan hmuh a la ni lo. C Lalruatdika hi South vanlaiphai bakah, Darzo leh Muallianpui khaw mite'n an zawng a; bialtu MLA Jeje Lalpekhlua'n mamawha hman atan pawisa leh tarpauline a pe a ni.