RTI chhanna leh minister sawi inang lo 2014-a VIP car lei nan Rs.3,33,59,943 séng

Secretariat Administration Department (SAD) chuan RTI Act hmanga zawhna chhangin, kum 2014-a SAD-in Verna leh Bolero car a leite chu sorkar officer-te hman tura ruahman a ni lo tih a tarlang. Hetih lai hian, Finance minister Lalsawta chuan February 13, 2015 khan Congress Bhavan-a thu a sawinaah, car thar leite chu sorkar official (officer)-te hman tura tih a ni thu leh official-te chuan minister leh parliamentary secretary-te an ken thu a sawi.

SAD-in RTI Act hmanga zawhna an chhan danin, kum 2014-a Verna leh Bolero car thar leite chu minister, parliamentary secretary, government deputy chief whip leh CM Secretariat tan pek vek a ni a; motor lei nan hian Rs. 3,33,59,943 sen tawh a ni.
RTI hmang hian January 2014 aṭanga February 18, 2015 thleng inkara SAD-in Verna leh Bolero car a leite chu sorkar officer-te hman tura tih a nih leh nih loh zawh a ni a; officer-te tana tih a nih chuan a changtu tur officer hming, designation, car dawn leh car man zat zawh a ni.
SAD SPIO-in zawhna a chhan dan chu, "Hemi hun chhunga SAD-in Verna car leh Bolero car a leite hi sorkar officer-te hman tura ruahmanna a awm hriat a ni lo," tih a ni. Verna car hi M/s Hauva & Sons aṭangin an lei a, Bolero chu Mana Motors aṭangin an lei.
Hetih lai hian, February 13, 2015 (Zirtawpni)-a Congress Bhavan-a inkhawmah Finance minister Lalsawta chuan, car thar leite chu sorkar official-te kawl tura tih a nih thu leh, official lamin, 'In motor kum nga in hmang tawh a, kawl zawk rawh u,' an tih avangin minister leh parliamentary secretary-te'n an hmang ta zawk niin a sawi. Motor leina atana nuai 342 dah chu an la hman zawh loh thu sawiin, "Motor hi lei tura tih zat kan la lei lo," a ti bawk.
SAD tarlan danin, tuna sorkar term kal laiah hian January 2014 aṭanga February 18, 2015 thleng khan VIP-te hman tur Verna car 18 lei tawh a ni a, Rs. 1,77,28,310 sen a ni. July 24, 2014-ah Verna car pasarih an lei a, November 25, 2014-ah Verna car pathum leh January 5, 2015-ah Verna car pariat an lei leh ni.
July 24, 2014-a Verna car pasarih an leite hi VTVT (1.6L) SX '0' vek a nih laiin, a man hi a inang lo vek thung. A man zat an tarlante chu - Rs. 9,81,991; Rs. 9,74,646; Rs. 9,77,446; Rs. 9,75,796; Rs. 9,77,896 leh Rs. 9,70,796 man pahnihte a ni. November 25, 2014-a Verna car pathum an leite leh January 5, 2015-a pariat dang an lei lehte chu Rs. 9,90,813 man vek a ni thung.
January 2014 aṭanga February 18, 2015 inkarah vek Bolero car 18 lei a ni a, leina atan Rs. 1,50,32,853 sên a ni. July 24, 2014-ah Bolero car 12 lei a ni a; 12 zinga 10 chu LXWDD BS-III niin, a vaia senso chu Rs. 82,87,450 a ni a, pahnih dang chu ZLX BS-IV niin, Rs. 8,13,750 man leh Rs. 8,13,248 man a ni.
September 2, 2014-ah Bolero ZLX BS-IV pakhat, Rs 8,49,691 man lei a ni a; September 21, 2014-ah Bolero ZLX BS-IV pali lei leh niin, pakhat man chu Rs. 8,44,891 a ni. September 21-ah vek hian Bolero LXWDD BS-III pakhat, Rs. 8,89,150 man lei a ni bawk.
Heng bakah hian Bolero Camper (Di Long 4WD) pakhat lei a ni a, Rs. 5,98,780 man a ni. Bolero car 18 leh Bolero pick-up pakhat, a vaiin Bolero 19 leina atan Rs. 1,56,31,633 hmang a ni.
SAD chuan, Bolero 19 leh Verna car 18 leina atan Rs. 3,33,59,943 hman tawh a nih thun leh, motor lei lehna atan cheng nuai 10 vel hman tur a la awm thu an tarlang a; Verna car leh Bolero car-te chu a kawltute hming ziah lan a nih laiin, Bolero pick-up pakhat erawh chu a kawltu ziah lan a ni lo.