KHAWTHLIR

Rev Vanlalbela'n ama chanchin a ziahna lehkhabu, 'Ka hmaah dawhkan I buatsaih ṭhin,' tih chu September 5 khan Rev RC Lalnghakliana'n Pathian hnenah hlanin 

a tlangzarh.

Central YMA chuan thuchhuah siamin, Teachers' Day, September 5 pualin hmun hrang hranga zirtirtute duhsakna chibai an bûk tih an tarlang a, "Râltiang ram thleng tura min kaihruaitu zirtirtute, kan ram leh hnam tana ṭhahnemngai taka in hnate thawk 

chhunzawm zel turin kan ngen a che u," an ti.

September 5, Inrinni khan Tuithiang Vengchhak Branch KṬP-te'n Synod Hospital tan thisen unit 15 an pe a, petute mipa 12 leh hmeichhia pathum an ni a; voluntary donation dang unit 14 a awm. Lunglawn Unit ṬKP-te'n an kohhran hall-ah Lunglei Civil Hospital tan thisen unit  23 an pe a, Adventist Youth Federation-te'n unit 40 an pe bawk.

Central YMA chuan September 5, Inrinni khan thuchhuah siamin, Saizawh West khuaa Mizo pawisawilote Chakma ṭhalaite'n kut an thlak chu an dem tak zet thu an tarlang. CYMA hian mi kutthlaktu Chakma ṭhalaite chu dan anga a na thei ang bera hrem turin sorkar an phût a ni.

September 4-5 khan Assam Rifles-te chuan Myanmar zu leh heroin an man. Assam Rifles-te hian Kàwlbêmah Myanmar zu ûm 72, Rs. 36,000 hù an man a, Melthumah heroin gram 123, Rs. 9,84,000 hû an man bakah, Zokhawtharah Rs. 2,62,000 hù Myanmar beer can 984, an man bawk. Ruihhlo kaihhnawiha mante chu police hnenah an hlan 

a ni.

Covid-19 doa India leh Myanmar inrina-a tlawmngaia duty ṭhin, a rammutna aṭanga rannung seh (scrub typhus) natna a vei vanga August 12, 2020-a thi Champhai Vengthlang YMA president C Lalṭanpuia (46) s/o C Suakneka (L) chu nimin khan sorkarin CM Relief Fund aṭangin Rs. 1,00,000 in an ral a, ralna hi a nupui H Lalnuntluangi hnenah hlan a ni.