Jail-ah thiam thil zirna siam dawn

State Planning Board vice chairman H Lian­sailova chuan, Inrinni khan Kolasib District Jail a tlawh a, jail tángte chu sorkarin jail chhungah thiam thil inzirna chi hrang hrang a buatsaihsak dawn thu a hrilh.

H Liansailova chuan, "Tuna nunphung dik loa in nun vanga chhungkua leh khawtlang tana mi hnawksak in nih ṭhinna a awm a nih pawhin, jail chhunga in awm chhung hian in nun siamṭhat tum ang che u. Kut themthiamna thil chi hrang hrang zirna hun in nei a, eizawnna thianghlim nei thei turin buatsaih in ni dawn," a ti.

H Liansailova hian Kolasib District Jail tan hian agarbati stick siamna khawl 10, ceiling fan panga leh volleyball leh a net-te a pe. Kolasib District Jail-ah hian tun dinhmunah táng mi 103 an awm a, an zinga pali chu hmeichhia an ni.