H/S headmaster 48 hnawhkhah tum mek
Mizoram sorkara high school headmaster post ruak 48 chu April 2015 chhungin Mizoram sorkarin hnawhkhah a tum a, tunah hian School Education department-in tih tur ṭulte a buaipui mek.
School Education minister H Rohluna chuan Vanglaini palai zawhna chhangin, H/S zirtirtu seniority chungchangah High Court-a kal an awm avangin hun eng emawti chhung chu H/S headmaster post ruak hnawhkhat thei loa an sawi thu a sawi a, "High Court-in tun hnai khan judgement a siam a, tunah chuan H/S headmaster post ruakte kan hnawhkhat thei tawh dawn a ni," a ti.
H Rohluna chuan, H/S headmaster post 48 hnawhkhahna tur chu DP&AR-in an buaipui mek thu sawiin, "Kar leh lamah chuan MPSC-ah an pek tawh kan beisei a, MPSC-in an khawih zui dawn a ni," a ti.
Kum hmasa lamah pawh zirtirtu headmaster/headteacher-a kaisantir a, thingtlang lama awm tura tih an nihin, zirtirtu ṭhenkhatin an zawm duh loh thu leh, kaisang loa khawpuia awm an thlan zawk fo thu sawiin, H Rohluna chuan, "Nikumah pawh kaisantira thingtlanga awm tura tih zinga 70% chiahin an zawm a ni," a ti a; hetiang hi an harsatna tawh pakhat a nih thu a sawi.
School Education Minister chuan, zirtirtu kaisantira thingtlanga awm tura tih, awm duh lo leh kaisan loh thlang zawkte chu kaisanna tur chance awm lehah pawh an chungchang ngaihtuah loh tura tih a nih thu a sawi a; tun hnuah chuan khauh zawka kal an tum thu a sawi bawk.