KHAWTHLIR

SAY Youth Day
Inrinni khan Seventh Day Adventist Youth (SAY) chuan khawvel pumah Global Youth Day an hmang a; Aizawla SAY-te chuan zingkarah damdawi-in hrang hrang tlawhin ei tur an sem. Chhunah Upper Republic-a Adventist biak-inah thisen pek runpui huaihawtin thisen unit 109 an pe.

Assembly session
Mizoram Assembly session chu Inrinni leh Pathianni chawlh a nih hnuah vawiin chawhma dar 10:30 hian chhun­zawm a ni ang. Vawiinah chuan April-July 2015 chhunga sorkar sum hman tur ruahman Vote on Account 2015-16 leh kum 2014-15 chhunga sum indaih lohna phuhrukna tur sum ruahman Supplementary Demands for Grants-te sawihoa pass tum a ni ang.

Kawng thian
Rangvamuala lei min thenfai hna chu Inrinni zing aṭang khan thawh chhunzawm a ni. Zing dar 6 aṭanga zan dar 8 thleng thawh ṭhin tur a ni a, hna thawh chhung­in kawngpui khâr a ni.

PYD Day
March 21, Inrinni kha Pentecostal Youth Department (PYD) Day a ni a, intihhlimna leh infuih tharna, khawtlang tana thil ṭha tihna ni atante an hmang. Thenzawl bial PYD chuan Serchhip Hospital tan thisen unit 42 an pe a, mipa 37 leh hmeichhia panga an ni.

MJA Rising Day
Vawiin, March 23 hi MJA din champa, 'Rising Day' a ni a, chhun dar 12:30-ah Aizawl Press Club-ah a lawmna thingpui inho tur a ni. MJA gen.hqrs. chuan Rising Day lawmnaa tel vek turin MJA member-te a hriattir.

Khawlai tifai
National Rural Drinking Water & Sanitation Awareness Week pualin Inrinni khan Lawngtlaia veng hrang hrangte chu an vengah ṭheuh khawlai thianfaiin an hnatlang.

A va hlu em’
Vincent Vanlalthlana Pachuau lehkhabu ziah, ‘A va hlu em’ tih chu Inrinni khan Aizawl Press Club-ah R Lalremruata'n a tlangzarh. Lehkhabuah hian sermon tawi, testimony leh quotation-te a awm a, Rs. 100 man a ni.