Kolasib Sports Stadium tur lung phûm

Chief minister Lal Thanhawla chuan Inrinni khan Kolasib Veng­laiah cheng nuai 2,268.43 sênga Sports Stadium sak tur lungphùm a phúm. Chief Minister chuan, infiamna hmunhmaah ṭhalaite an rualawh lohna atan sorkarin chak taka hma a lak thu a sawi.

Lal Thahawla chuan, sorkarin ṭha­laite'n infiamna eizawnna tling leh hausakna atana an hman theihna turin theihtawp a chhuah zel tih sawiin, "Kum 2016 Olympic-a Mizo ṭhalaite kan tel ve theihna turin Vision 2016 chu chak taka kalpui a ni a, kan theihna discipline-ah zirtirna leh incentive-te kalpui mek a ni. Hma kan sawn dawn chuan kan zavaia kan ṭan tlan a ṭul a, a chhe lai siamṭhatu tur vek kan ni," a ti.

Kolasib-a Sports Stadium sak tur chu ṭhalaite'n khawtlang nun siam nan leh Zo nun mawi lanchhuahtir nan ṭangkai takin hmang se a duh thu sawiin, Lal Thanhawla chuan, chak taka hnathawh a nih theih nan a satu turte phûr taka ṭawiawm ṭhin turin Kolasib mipuite a chah.

Chief Minister chuan, ram leh hnam hmasawnna turah a kaihhruai sorkar a chian thu sawiin, "A kawng kan hria a, kan árkhawthim dài ve mai mai lo. Amaherawhchu, hmasawnna tur project lian kan kalpuinaah ram leilung fate ngeiin harsatna kan siam nasa ṭhin hi a vanduaithlak hle. Kuttlingloa sum lak pawisak lohna vangin kan kal chak thei lo a ni," a ti.

Kolasib Sports Complex sak tur lungphûm inkhawm hi Sports minister Zodintluanga'n a kaihruai a; bialtu MLA PC Zoram Sangliana leh Planning Board vice chairman H Liansailova te pawhin thu an sawi.

Kolasib Venglaia Sports Sta­dium sakna atan hian Ministry of Urban Development chuan Octo­ber 8, 2014-ah cheng nuai 2,268.43 a rawn pe a, National Buildings Construction Cor­pora­tion (NBCC)-in an sa ang. Thla 32 chhunga zawh tura ruahman a ni.

Sports Stadium chhungah hian football stadium (artificial grass), intlansiakna, gym leh boxing hall-te siam a ni dawn a; gallery-ah mipui 15,000 leng tur leh VIP gallery-ah mi 100 leng tura ruahman a ni.